Ganapati Upanishad

नमस्ते गणपतये ॥

namaste gaṇapataye ॥

त्वमेव प्रत्यक्षं तत्त्वमसि । त्वमेव केवलं कर्तासि । त्वमेव केवलं धर्तासि । त्वमेव केवलं हर्तासि । त्वमेव सर्वं खल्विदं ब्रह्मासि । त्वं साक्षादात्मासि ॥

tvameva pratyakṣaṃ tattvamasi । tvameva kevalaṃ kartāsi । tvameva kevalaṃ dhartāsi । tvameva kevalaṃ hartāsi । tvameva sarvaṃ khalvidaṃ brahmāsi । tvaṃ sākṣādātmāsi ॥

नित्यं ऋतं वच्मि । सत्यं वच्मि ।।

nityaṃ ṛtaṃ vacmi । satyaṃ vacmi ।।

अव त्वं माम्। अव वक्तारम् । अव श्रोतारम् । अव दातारम् । अव धातारम् । अवानूचानमव शिष्यम् । अव पश्चात्तात् । अव पुरस्तात् । अव चोत्तरात्तात् । अव दक्षिणात्तात् । अव चोर्ध्वात्तात् । अवाधरात्तात् । सर्वतो मां पाहि पाहि समन्तात् ।।

ava tvaṃ mām। ava vaktāram । ava śrotāram । ava dātāram । ava dhātāram । avānūcānamava śiṣyam । ava paścāttāt । ava purastāt । ava cottarāttāt । ava dakṣiṇāttāt । ava cordhvāttāt । avādharāttāt । sarvato māṃ pāhi pāhi samantāt ।।

त्वं वाड्मयस्त्वं चिन्मयः । त्वमानन्दमयस्त्वं ब्रह्ममयः । त्वं सच्चिदानन्दाद्वितीयोऽसि । त्वं प्रत्यक्षं ब्रह्मासि । त्वं ज्ञानमयो विज्ञानमयोऽसि ।।

tvaṃ vāḍmayastvaṃ cinmayaḥ । tvamānandamayastvaṃ brahmamayaḥ । tvaṃ saccidānandādvitīyo'si । tvaṃ pratyakṣaṃ brahmāsi । tvaṃ jñānamayo vijñānamayo'si ।।

सर्वं जगदिदं त्वत्तो जायते । सर्वं जगदिदं त्वत्तस्तिष्ठति । सर्वं जगदिदं त्वयि लयमेष्यति । सर्वं जगदिदं त्वयि प्रत्येति । त्वं भूमिरापोऽनलोऽनिलो नभः । त्वं चत्वारि वाक्पदानि । त्वं गुणत्रयातीतः । त्वं कालत्रयातीतः । त्वं देहत्रयातीतः । त्वं मूलाधारस्थितोऽसि नित्यम्। त्वं शक्तित्रयात्मकः । त्वां योगिनो ध्यायन्ति नित्यम्। त्वं ब्रह्मा त्वं विष्णुस्त्वं रुद्रस्त्वमिन्द्रस्त्वमग्निस्त्वं वायुस्त्वं सूर्यस्त्वं चन्द्रमास्त्वं ब्रह्म भूर्भुवः सुवरोम्।।

sarvaṃ jagadidaṃ tvatto jāyate । sarvaṃ jagadidaṃ tvattastiṣṭhati । sarvaṃ jagadidaṃ tvayi layameṣyati । sarvaṃ jagadidaṃ tvayi pratyeti । tvaṃ bhūmirāpo'nalo'nilo nabhaḥ । tvaṃ catvāri vākpadāni । tvaṃ guṇatrayātītaḥ । tvaṃ kālatrayātītaḥ । tvaṃ dehatrayātītaḥ । tvaṃ mūlādhārasthito'si nityam। tvaṃ śaktitrayātmakaḥ । tvāṃ yogino dhyāyanti nityam। tvaṃ brahmā tvaṃ viṣṇustvaṃ rudrastvamindrastvamagnistvaṃ vāyustvaṃ sūryastvaṃ candramāstvaṃ brahma bhūrbhuvaḥ suvarom।।

गणादिं पूर्वमुच्चार्य वर्णादिं तदनन्तरम्। अनुस्वारः परतरः। अर्धेन्दुलसितम्। तारेण रुद्धम्। एतत्तव मनुस्वरूपम् ॥

gaṇādiṃ pūrvamuccārya varṇādiṃ tadanantaram। anusvāraḥ parataraḥ। ardhendulasitam। tāreṇa ruddham। etattava manusvarūpam ॥

गकारः पूर्वरूपम्। अकारो मध्यमरूपम्। अनुस्वारश्चान्त्यरूपम्। बिन्दुरुत्तररूपम् । नादः संधानम्। संहिता संधिः। सैषा गणेशविद्या॥

gakāraḥ pūrvarūpam। akāro madhyamarūpam। anusvāraścāntyarūpam। binduruttararūpam । nādaḥ saṃdhānam। saṃhitā saṃdhiḥ। saiṣā gaṇeśavidyā॥

गणक ऋषिः । निचृद्गायत्री छन्दः । श्रीमहागणपतिर्देवता । ॐ गम्।( गणपतये नमः ॥

gaṇaka ṛṣiḥ । nicṛdgāyatrī chandaḥ । śrīmahāgaṇapatirdevatā । oṃ gam।( gaṇapataye namaḥ ॥

एकदन्ताय विद्महे वक्रतुण्डाय धीमहि। तन्नो दन्ती प्रचोदयात्॥

ekadantāya vidmahe vakratuṇḍāya dhīmahi। tanno dantī pracodayāt॥

एकदन्तं चतुर्हस्तं पाशमङ्कुशधारिणम् । अभयं वरदं हस्तैर्बिभ्राणं मूषकध्वजम् ॥

ekadantaṃ caturhastaṃ pāśamaṅkuśadhāriṇam । abhayaṃ varadaṃ hastairbibhrāṇaṃ mūṣakadhvajam ॥

रक्तं लम्बोदरं शूर्पकर्णकं रक्तवाससम्। रक्तगन्धानुलिप्ताङ्गं रक्तपुष्पैः सुपूजितम् ॥

raktaṃ lambodaraṃ śūrpakarṇakaṃ raktavāsasam। raktagandhānuliptāṅgaṃ raktapuṣpaiḥ supūjitam ॥

भक्तानुकम्पिनं देवं जगत्कारणमच्युतम्। आविर्भूतं च सृष्ट्यादौ प्रकृतेः पुरुषात्परम् ॥

bhaktānukampinaṃ devaṃ jagatkāraṇamacyutam। āvirbhūtaṃ ca sṛṣṭyādau prakṛteḥ puruṣātparam ॥

एवं ध्यायति यो नित्यं स योगी योगिनां वरः ॥

evaṃ dhyāyati yo nityaṃ sa yogī yogināṃ varaḥ ॥

नमो व्रातपतये नमो गणपतये नमः प्रमथपतये नमस्तेऽस्तु लम्बोदरायैकदन्ताय विघ्नविनाशिने शिवसुताय श्रीवरदमूर्तये नमो नमः॥

namo vrātapataye namo gaṇapataye namaḥ pramathapataye namaste'stu lambodarāyaikadantāya vighnavināśine śivasutāya śrīvaradamūrtaye namo namaḥ॥

एतदथर्वशिरो योऽधीते स ब्रह्मभूयाय कल्पते । स सर्वविघ्नैर्न बाध्यते । स सर्वतः सुखमेध-ते। स पञ्चमहापातकोपपातकात्प्रमुच्यते । सायमधीयानो दिवसकृतं पापं नाशयति । प्रातरधीयानो रात्रिकृतं पापं नाशयति । सायंप्रातः प्रयुजानोऽपापो भवति। धर्मार्थकाममोक्षं च विन्दति ॥

etadatharvaśiro yo'dhīte sa brahmabhūyāya kalpate । sa sarvavighnairna bādhyate । sa sarvataḥ sukhamedha-te। sa pañcamahāpātakopapātakātpramucyate । sāyamadhīyāno divasakṛtaṃ pāpaṃ nāśayati । prātaradhīyāno rātrikṛtaṃ pāpaṃ nāśayati । sāyaṃprātaḥ prayujāno'pāpo bhavati। dharmārthakāmamokṣaṃ ca vindati ॥

इदमथर्वशीर्षमशिष्याय न देयम्। यो यदि मोहाद्दास्यति स पापीयान्भवति॥

idamatharvaśīrṣamaśiṣyāya na deyam। yo yadi mohāddāsyati sa pāpīyānbhavati॥

सहस्त्रावर्तनायं यं काममधीते तं तमनेन साधयेत् । अनेन गणपतिमभिषिञ्चति स वाग्मी भवति । चतुर्थ्यामनश्नञ्जपति स विद्यावान्भवति । इत्यथर्वणवाक्यम्। ब्रह्माद्याचरणं विद्यात्।। न बिभेति कदाचनेति। यो दूर्वाङ्कुरैर्यजति स वैश्रवणोपमो भवति । यो लाजैर्यजति स । यशोवान्भवति। स मेधावान्भवति। यो मोदकसहस्त्रेण यजति स वाञ्छितफलमवाप्नोति । यः साज्यसमिद्भिर्यजति स सर्वं लभते स सर्वं लभते। अष्टौ ब्राह्मणान्सम्यग्ग्राहयित्वा सूर्यवर्चस्वी भवति । सूर्यग्रहणे महानद्यां प्रतिमासंनिधौ वा जप्त्वा सिद्धमन्त्रो भवति । महाविघ्नात्प्रमुच्यते।महापापात्प्रमुच्यते । महादोषात्प्रमुच्यते ॥

sahastrāvartanāyaṃ yaṃ kāmamadhīte taṃ tamanena sādhayet । anena gaṇapatimabhiṣiñcati sa vāgmī bhavati । caturthyāmanaśnañjapati sa vidyāvānbhavati । ityatharvaṇavākyam। brahmādyācaraṇaṃ vidyāt।। na bibheti kadācaneti। yo dūrvāṅkurairyajati sa vaiśravaṇopamo bhavati । yo lājairyajati sa । yaśovānbhavati। sa medhāvānbhavati। yo modakasahastreṇa yajati sa vāñchitaphalamavāpnoti । yaḥ sājyasamidbhiryajati sa sarvaṃ labhate sa sarvaṃ labhate। aṣṭau brāhmaṇānsamyaggrāhayitvā sūryavarcasvī bhavati । sūryagrahaṇe mahānadyāṃ pratimāsaṃnidhau vā japtvā siddhamantro bhavati । mahāvighnātpramucyate।mahāpāpātpramucyate । mahādoṣātpramucyate ॥

स सर्वविद्भवति स सर्वविद्भवति । य एवं वेदेत्युपनिषत् ॥

sa sarvavidbhavati sa sarvavidbhavati । ya evaṃ vedetyupaniṣat ॥