Tripura Upanishad

तिस्त्रः पुरस्त्रिपथा विश्वचर्षणा अत्राकथा अक्षराः संनिविष्टाः । अधिष्ठायैना अजरा पुराणी महत्तरा महिमा देवतानाम्॥

tistraḥ purastripathā viśvacarṣaṇā atrākathā akṣarāḥ saṃniviṣṭāḥ । adhiṣṭhāyainā ajarā purāṇī mahattarā mahimā devatānām॥

नवयोनीर्नवचक्राणि दधिरे नवैव योगा नव योगिन्यश्च । नवानां चक्रा अधिनाथा स्योना नव भद्रा नव मुद्रा महीनाम्॥

navayonīrnavacakrāṇi dadhire navaiva yogā nava yoginyaśca । navānāṃ cakrā adhināthā syonā nava bhadrā nava mudrā mahīnām॥

एका स आसीत्प्रथमा सा नवासीदा सोनविंशादा सोनत्रिंशात्। चत्वारिंशादथ तिस्त्रः समिधा उशतीरिव मातरो माऽऽविशन्तु ॥

ekā sa āsītprathamā sā navāsīdā sonaviṃśādā sonatriṃśāt। catvāriṃśādatha tistraḥ samidhā uśatīriva mātaro mā''viśantu ॥

ऊर्ध्वज्वलज्ज्वलनं ज्योतिरग्रे तमो वै तिरश्चीनमजरं तद्रजोऽभूत्। आनन्दनं मोदनं ज्योतिरिन्दोरेता उ वै मण्डला मण्डयन्ति ॥

ūrdhvajvalajjvalanaṃ jyotiragre tamo vai tiraścīnamajaraṃ tadrajo'bhūt। ānandanaṃ modanaṃ jyotirindoretā u vai maṇḍalā maṇḍayanti ॥

यास्तिस्त्रो रेखाः सदनानि भूस्त्रीस्त्रिविष्टपास्त्रिगुणास्त्रिप्रकाराः। एतत्त्रयं पूरकं पूरकाणां मन्त्री प्रथते मदनो मदन्या ॥

yāstistro rekhāḥ sadanāni bhūstrīstriviṣṭapāstriguṇāstriprakārāḥ। etattrayaṃ pūrakaṃ pūrakāṇāṃ mantrī prathate madano madanyā ॥

मदन्तिका मानिनी मंगला च सुभगा च सा सुन्दरी सिद्धिमत्ता। लज्जा पतिस्तुष्टिष्टिा च पुष्टा लक्ष्मीरुमा ललिता लालपन्ती ॥

madantikā māninī maṃgalā ca subhagā ca sā sundarī siddhimattā। lajjā patistuṣṭiṣṭiā ca puṣṭā lakṣmīrumā lalitā lālapantī ॥

इमां विज्ञाय सुधया मदन्ती परिसृता तर्पयन्तः स्वपीठम्। नाकस्य पृष्ठे महतो वसन्ति परं धाम त्रैपुरं चाविशन्ति ।।

imāṃ vijñāya sudhayā madantī parisṛtā tarpayantaḥ svapīṭham। nākasya pṛṣṭhe mahato vasanti paraṃ dhāma traipuraṃ cāviśanti ।।

कामो योनिः कामकला वज्रपाणिर्गुहा हसा मातरिश्वाभ्रमिन्द्रः । पुनर्गहा सकला मायया च पुरूच्येषा विश्वमातऽऽदिविद्या ॥

kāmo yoniḥ kāmakalā vajrapāṇirguhā hasā mātariśvābhramindraḥ । punargahā sakalā māyayā ca purūcyeṣā viśvamāta''dividyā ॥

षष्ठं सप्तममथ वह्निसारथिमस्या मृलत्रिकमादेशयन्तः। कथ्यं कविं कल्पर्क काममीशं तुष्टुवांसो अमृतत्वं भजन्ते ॥

ṣaṣṭhaṃ saptamamatha vahnisārathimasyā mṛlatrikamādeśayantaḥ। kathyaṃ kaviṃ kalparka kāmamīśaṃ tuṣṭuvāṃso amṛtatvaṃ bhajante ॥

पुरं हन्त्रीमुखं विश्वमातू रवे रेखा स्वरमध्यं तदेषा। बृहत्तिथिर्दश पञ्चा च नित्या सषोडशिकं पुरमध्यं बिभर्ति ॥

puraṃ hantrīmukhaṃ viśvamātū rave rekhā svaramadhyaṃ tadeṣā। bṛhattithirdaśa pañcā ca nityā saṣoḍaśikaṃ puramadhyaṃ bibharti ॥

यद्वा मण्डलाद्वा स्तनबिम्बमेकं मुखं चाधस्त्रीणि गुहासदनानि। कामीकलां कामरूपां चिकित्वा नरो जायते कामरूपश्च कामः ।।

yadvā maṇḍalādvā stanabimbamekaṃ mukhaṃ cādhastrīṇi guhāsadanāni। kāmīkalāṃ kāmarūpāṃ cikitvā naro jāyate kāmarūpaśca kāmaḥ ।।

परिसृतं झषमाजं पलं च भक्तानि योनी: सुपरिष्कृताश्च। निवेदयन्देवतायै महत्त्यै स्वात्मीकृते सुकृते सिद्धिमेति ॥

parisṛtaṃ jhaṣamājaṃ palaṃ ca bhaktāni yonī: supariṣkṛtāśca। nivedayandevatāyai mahattyai svātmīkṛte sukṛte siddhimeti ॥

सृण्येव सितया विश्वचर्षणिः पाशेनैव प्रतिबध्नात्यभीकान्। इषुभिः पञ्चभिर्धनुषा च विध्यत्यादिशक्तिररुणा विश्वजन्या ।।

sṛṇyeva sitayā viśvacarṣaṇiḥ pāśenaiva pratibadhnātyabhīkān। iṣubhiḥ pañcabhirdhanuṣā ca vidhyatyādiśaktiraruṇā viśvajanyā ।।

भगः शक्तिर्भगवान्काम व इंश उभा दाताराविह् सौभगानाम्। समप्रधानौ समसत्त्वौ समोजौ तयोः शक्तिरजरा विश्वयोनिः ।।

bhagaḥ śaktirbhagavānkāma va iṃśa ubhā dātārāvih saubhagānām। samapradhānau samasattvau samojau tayoḥ śaktirajarā viśvayoniḥ ।।

परिसृता हविषा भावितेन प्रसंकोचे गलिते वैमनस्कः । शर्वः सर्वस्य जगतो विधाता धर्ता हर्ता विश्वरूपत्वमेति ॥

parisṛtā haviṣā bhāvitena prasaṃkoce galite vaimanaskaḥ । śarvaḥ sarvasya jagato vidhātā dhartā hartā viśvarūpatvameti ॥

इयं महोपनिषत्रैपुर्या यामक्षरं परमो गीर्भिरीट्टे। एषर्ग्यजुः परमेतच्च सामायमथर्वेयमन्या चविद्या।।

iyaṃ mahopaniṣatraipuryā yāmakṣaraṃ paramo gīrbhirīṭṭe। eṣargyajuḥ parametacca sāmāyamatharveyamanyā cavidyā।।

ॐ' ह्रीं ॐ ह्रीमित्युपनिषत् ॥

oṃ' hrīṃ oṃ hrīmityupaniṣat ॥